Gjiri i Vlorës përfaqëson një ndër zonat bregdetare më tërheqëse të Shqipërisë dhe është cilësuar si një zonë turistike mjaft e rëndësishme. Fatkeqësisht shqetësim për këtë zonë ka qenë rritja e nivelit të ndotjes në vitet e fundit për shkak të aktiviteteve njerëzore. Ai ndodhet në jug të Shqipërisë dhe përfaqëson kufijtë natyrorë ndërmjet detit Adriatik e Jon. Është një gji gjysmë i mbyllur me një këmbim të kufizuar të ujërave me detin Adriatik nëpërmjet kanalit hyrës (Rivaro.et al., 2011). Pas Gjirit të Durrësit, ai është më i madhi dhe më i rëndësishmi nga pikëpamja gjeografike dhe industriale. Gjiri i Vlorës ka një sipërfaqe prej 305 km², gjatësi prej 21 km dhe gjerësi 17 km. Ai nis në veri me Kepin e Triporteve dhe përfundon në perëndim me Kepin e Gjuhëzës. Hapësira ujore e Gjirit të Vlorës ndahet në dy pjesë të dallueshme:

1.     Pjesa jugore që fillon në jug të Ujit të Ftohtë dhe quhet Gjiri i Dukatit, i cili është më i ngushtë dhe më i thellë.

2.     Pjesa veriore që quhet Gjiri i Vlorës, i cili paraqitet më i gjerë dhe më i cekët.